Yeh samaaj bhikhariyon se bhara pada hai. Sab itne gareeb hain ki subah se shaam tak sirf bheek maangte hain — aur kuch kiya hi nahi jaata. Aur tum… tum bhi isi bheed ka hissa ho.

Main jinki baat kar raha hoon, unse apne aap ko alag mat samajhna. Kyunki jis gareebi ki baat mai kar raha hoon, woh paison se nahi toli jaati — yeh tumhari anant chahaton ki gareebi hai.

Socho, aakhir tumne kiya kya hai? Maanga hi to hai — kabhi bhagwan se, kabhi taqdeer se, kabhi kisi aur insaan se. Bas maangte chale gaye. Jis dharm mein paida hue, uske banaye hue Ishwar pe apni khwahishein thopte rahe. Isiliye toh aaj bhi khali haath ho, aur bhaag rahe ho — pata nahi kahan.

Ruko. Saans lo. Dekho zara. Apna andhapan mehsoos hota hai?

Tum maang rahe ho usse jiske paas sab kuch hai. Aur jab tum kehte ho “main chahta hoon aisa ho, aur aisa na ho”, tab tumhari chahatein us Ishwar se bhi upar ho jaati hain.

Yahi wajah hai ki har taraf dukh hai, bechaini hai, pareshani hai. Kyunki tumne dena kabhi seekha hi nahi — sirf maanga hi maanga hai.

Lekin jis din tum dena seekh jaoge, us din sab kuch badal jaayega.

Us din ek naya dharm janm lega — asal dharm, ameeron ka dharm. Aur yahaan “ameer” ka matlab paisa nahi hai. Paisa to aata jaata rahta hai. Kal kisi aur ki jeb mein tha, aaj tumhari jeb mein hai, kal kisi teesre ke paas hoga. Jis cheez ka daan ho sakta hai, wo to sirf wahi hai jo tumhara asli roop hai — tum khud.

Daan wahi hota hai jo tumhara ho. Aur tumhara kya hai? Tumhara ego, tumhara aham, tumhari aatma — jise jo naam dena chahe de. Lekin antim sach to yahi hai: tum khud hi apna daan ho.

Jab tum apne aap ko samarpit kar doge, toh sab kuch badal jaayega.

Phir tum kuch karne wale nahi rah jaate — tum sirf dekhne wale ho jaate ho. Drishta.

Aur tab sab kuch ek khel ban jaata hai. Tum us khel se ek ho jaate ho. Aur wahan koi bhikmanga nahi hota — sirf ek anandit drishta hota hai.